Gættu þín á Facebook
Það er svo mikið af sauðum á Internetinu. Stundum þarf maður að segja það sem ætti að vera borðleggjandi, þannig að hér kemur það.
Gætið að upplýsingum ykkar á netinu! Facebook er aðalstaðurinn til að míga persónuupplýsingunum sínum og annarra út um allt og nú ætla ég að kenna ykkur nokkur praktísk atriði.
Notaðu vinalistann
Það er sniðugt að flokka vini sína. Það hjálpar þér að stjórna upplýsingaflæðinu á forsíðunni, senda fjölpóst, bjóða í alla fávitaleikina sem þú tekur þátt í og svo, það besta, hjálpar það þér að gæta persónuupplýsinganna. Það er fullt af fólki á Facebok sem sendir þér vinaboð sem fær þig til að hugsa „hvað í helv..?“ en svo kanntu ekki við annað en að samþykkja, því hver veit nema þú rekist á viðkomandi manneskju draugfulla á bar þar sem hún húðskammar þig fyrir að hafa ekki samþykkt vinaboðið. Ég hef lent í því. Ég fékk einu sinni vinaboð frá manneskju sem ég talaði síðast við þegar við vorum saman í félagasamtökum fyrir 15 árum síðan og hún átti sömu vinkonu og ég. Ég sendi henni póst þar sem ég spurði: „Hver í dauðanum ert þú!?“ en á aðeins fínlegri hátt. Hún útskýrði það og spurði í kjölfarið hvað væri að frétta.
Ha? Hvar byrjar maður að svara svona spurningu? „Hm, skömmu eftir að ég og þú skiptumst á þeim einu 5 orðum sem við höfum nokkurn tímann yrt á hvort annað á ævinni, þá fermdist ég. Kennarinn minn í áttunda bekk var…“ Nei, kommon.
Allavega… Það sem birtist á Facebook um mig kemur ekki öllum við og þess vegna nýti ég vinalistana til að setja fólki mörk.
Ef þið viljið beita sömu aðferðum og ég þurfið þið fyrst að útbúa vinalista. Farið í friends valmyndina efst í Facebook. (Allar mínar stillingar eru á ensku. Ég þoli ekki íslenska viðmótið, því það kann ekki að fallbeygja). Þar undir er hægt að fara í create og búa til vinalista og á hann bætir maður svo fólki. Það sér enginn vinalistana ykkar, þannig að þið getið látið þá heita hvað sem er. Þið getið líka haft sama fólk í mörgum vinahópum.
Svo er það aðalmálið: Með því að fara í settings -> privacy -> profile getið þið stillt hverjir sjá hvað í prófílnum ykkar. Auk þess að geta skilgreint aðganginn nokkuð vítt, þá getið þið búið til útilokunarhópa með því að velja customize. Þannig getið þið komið í veg fyrir að ákveðnir hópar sjái myndirnar ykkar, myndir af ykkur sem aðrir tagga, statusinn ykkar og þar fram eftir götunum.
Þið getið svo notað vinalistann til að skilgreina eftir sömu leiðum hverjir sjá einstök myndaalbúm. Finnið það í myndastjórnborðinu.
Takmarkaðu sýnileikann
Þegar einhver leitar að þér á Facebook eru allar líkur á að hann geti skoðað vinalistann þinn, uppáhalds síðurnar þínar og fleira skemmtilegt ef þú hefur ekki stillt hlutina rétt. Undir settings -> privacy -> profile skaltu ganga úr skugga um að það sem er í prófílnum þínum sé aðeins sýnilegt vinum þínum en ekki hverjum sem er. Auk þess geturðu haft áhrif á hvernig þú birtist í leitarniðurstöðum með því að stilla settings -> privacy -> search rétt.
Takmarkaðu upplýsingarnar sem Facebook leikirnir og forritin geta nálgast
Helst vildi ég bara garga mig hásan á alla í kringum mig að hætta að nota þessa andskotans leiki, því mér gæti ekki verið meira sama um það hvers lenskur ostur gamall bekkjarbróðir minn er eða hvort miðaldra frænka mín vilji helst gera það í hjólböru- eða lótusstellingunni. Í alvörunni… Skítsama! En það gengur ekki, þannig að skárri kostur er líklega að stilla upplýsingaflæðið til framleiðenda forritanna. Málið er nefninlega að hönnuðir spurningaleikjanna, forritanna og leikjanna sem eru á Facebook hamstra upplýsingar um ykkur í ótrúlegu magni og – það sem verra er – um alla vini ykkar líka. Þess vegna nægir mér ekki að hunsa allt þetta drasl meðan allir í kringum mig velta sér upp úr þessu rugli.
Ég fór í settings -> privacy -> applications og smellti þar á settings þar sem ég tók hakið úr öllu sem þar var. Ég mæli með að þið gerið það líka.
Svo mörg voru þau orð.
Sækettlingar, ekki fiskar!
Ekki er öll vitleysan eins, en það hafa dýraverndunarsamtökin PETA sýnt og sannað svo um munað með glænýrri tegund af botnlausri vitleysu.
Samkvæmt PETA hafa fiskar verið illa sviknir um markaðssetningu, bæði af völdum náttúrunnar og manna. Náttúran gaf þeim undarlegt útlit með augun hvort sínu megin á höfðinu, slímugan búk og andlitið oddmjótt. Nafnið fiskur er svo ekki alveg nógu fallegt, þykir PETA, svo þeir hafa kokkað upp markaðsherferð fyrir fiskana sem á að letja fólk í því að veiða þá og snæða.
Köllum þá SÆKETTLINGA!
Ég var sannfærður um að þetta hlyti að vera kjaftæði þegar ég heyrði þetta fyrst ein þeim virðist vera fúlasta alvara. Á síðunni sem tileinkuð er málstaðnum segja þeir meðal annars frá því að sækettlingabörn eigi ekki að kalla kavíar. Einnig benda samtökin á að sækettlingarnir rækti sína eigin litlu þaragarða niðri á sjávarbotni og það sé svo sorglegt þegar mannfólkið éti þá, því garðarnir þeirra falli við það í órækt.
Þegar sá sem skoðar síðuna er búinn að lesa sækettlingafróðleikinn, varalita fiska og líma á þá einhyrningshorn hefur hann líklega hrifist með í sykurfrauðsviðbjóðnum en þá er bara tímaspursmál hvenær hann rekst á „sögur fyrir sækettlinga“ og sekkur ofan í þunglyndisóminni yfir þeim myrku örlögum sem bíða sækettlinganna í raun og veru. Sögurnar eru svo innilega sjúkar að ég get ekki gert þeim nægilega skil með orðum og verð bara að tengja í þær.
Ég ætla að fá mér plokksækettling í kvöldmat á morgun.
Hnappurinn
Ég var að horfa á stuttmyndina Hnappinn, sem tilnefnd er til Edduverðlauna.
http://mystery.is/HnappurinnIKSA/
Ég veit ekki… kannski er ég ekki nógu artí. En um leið og hnappurinn fannst hugsaði ég: “Oooh, djöfuls artíprump. Svo ýtir hann á hnappinn og myndin búin. Vává, voða frumlegt.”
…og svo var það einmitt það sem gerðist.
En það er víst meira en söguþráður sem prýðir góða mynd. Það heillar mig samt ekki.
PS. Þeir sem ekki vilja vita hvernig myndin endar hefðu ekki átt að lesa þessa færslu.
Sterkasti maður alheims!
Hér höfum við mann sem hefur gifst 24 sinnum og á nú 4 konur. Hann er 35 barna faðir sem kemur vart á óvart, enda hefur maðurinn mök 15 sinnum á dag.
Svo er það besta. Hann hefur 260 hestafla styrk …samkvæmt læknisvottorði 
Myndbandið er alveg kostulegt.
Þjófkenndur
Ég var í ræktinni um daginn, sem telst auðvitað til stórtíðinda, og hafði nýlokið æfingunum svo ég hélt inn í klefann. Inni í klefanum var fyrir heldur þéttva… – ókei, spikfeitur – karlmaður. Hann stóð í hinum enda klefans þegar ég tók mér stöðu við snagann minn. Á bekknum fyrir neðan snagann við hliðina lá farsími. Ég vissi hver átti fötin á snaganum og þar af leiðandi símann og ég velti því fyrir mér hvort ég ætti að stinga símanum ofan í töskuna hans fyrir hann svo honum yrði ekki stolið. En ég vildi samt ekki láta hann halda að símanum hefði verið stolið þegar hann fyndi hann ekki á bekknum svo ég stóð í svolitla stund og horfði á símann og innganginn til skiptis meðan ég reyndi að ákveða mig. Innganginn leit ég á þegar ég velti því fyrir mér að fara fram og láta hann vita af stöðu símans.
Allavega. Belgurinn sem deildi með mér klefa tók greinilega eftir þessum skyndilega áhuga mínum á símanum og ályktaði að ég ætlaði að stela honum. Ég fann fyrir honum stara á hnakkann á mér, en aðstæður urðu snöggtum skemmtilegri þegar hann færði sig yfir í minn helming klefans og tók sér stöðu þannig að hann sá vel bæði mig og símann. Hann stóð semsagt á algjörlega fáránlegum stað með handklæði utan um sig og hafði ekkert að gera nema glápa á mig.
Ég vissi alveg hvað hann hugsaði og hugsaði um að afsaka mig einhvernveginn en svo varð ég bara reiður og langaði að skamma hann fyrir dylgjurnar. Á endanum leyfði ég honum bara að standa og stara á mig meðan ég bjó mig undir sturtuferð.
Svo birtist eigandi símans skyndilega út úr sturtuklefanum og þá bakkaði feiti varðhundurinn aftur á sinn stað.
Slagsmálasena frá Bollywood
Bollywood er best
Allir elska fyndin heimamyndbönd
Sama hve Bob Saget gat verið innilega ófyndinn, þá kyngdi maður ælunni um leið og næsta myndband kom upp á skjáinn. Því hvað er fyndnara en að hlæja að uppátækjum og óförum annarra?
10 mikilvægar spurningar
10 spurningar sem skynsamir kristnir einstaklingar ættu að spyrja sig. Ágætlega áhugavert myndband. Um miðbikið var mér farið að þykja þetta dálítið þunnt en í lokin koma svörin og þá verður aftur gaman.
